[Album photos] [Article Al-Anwar]
[كلمة الأب الرئيس] [كلمة ممثّل الهيئة التعليميّة ] [كلمة ممثّل
الطلاّب ][كلمة ممثّل
قائد الجيش ]
أحبائي
يا أبناء وطني
حكيوا كتير عن الإستقلال
من شي ستين سِني وهنّي يحكوا... خلّصوا الحكي والشعر، وهنّي يحكوا.
وبرْيو دينينا هنّي ويحكوا... وبريو القلام هني ويكتبوا...
واليوم، وينو الإستقلال ؟
مين لي قال إنو الإستقلال هوّي بس حكي وشعر ؟
مينوّي لي قال إنو الإستقلال أرض ما فيا احتلال ؟
وإنو الإستقلال صمود وحرب وقوافل شهدا ؟
مينو لي قال إنو الإستقلال سياسي وبس...
هودي كلّون نتفي من الإستقلال
مش الإستقلال كلّو...
الإستقلال هوّي سياسي وعلم، معرفي وإقتصاد، فكر وأدب...
الإستقلال، كلّ الإستقلال هوّي إنتَ وأنا، هوّي وهيّي ونحنا،
هوّي الإنسان كلّ الإنسان...
الإستقلال هوّي الناس والشعب المستقلين، مش الأرض المستقلي.
الأستقلال هوّي الشباب والصبايا المستقلين، لي بيعملوا الأرض مستقلي،
هوّي حالي مستمرّه، مسيرة عمل وقناعة وأخلاق ... هوّي حياة وعيش،
هوّي حالة وعي، إنو أنا مستقل، وعمل إرادي، إنو كون مستقل...
الإستقلال، من ها الصرح التربويّ العريق، هوّي تربيي، وتربيي، ومش حيالله تربيي
ليش؟
لأنو لمن بتربّى وبوعى خَياري وبعرفْ وبقتنِع إنو هيدا وطني، أنا اخترتو وطني، وما بدّي وطن غيرو، بكون مستقل، وعم عيش الإستقلال...
لمّا بعرف إنو وطني هيدا هوّي وطن غيري، كمان هوّي اختاروا تيكون وطنو، وبيساعني وبيساعو، بكون مستقل، وعم عيش الإستقلال.
لمن بتربّى، بَعرِفْ وبقبَل إنو وطني هيدا بيقبل رأيي ورأي غيري، وهوّي بيساع حزبي وحزب غيري، بكون مستقل، وعم عيش الإستقلال.
لمن بتربّى، بَعْرِفْ إنو وطني بحاجي لإلي، وأنا بخدمتو، مش العكس، وإنو خدمة وطني يعني خدمة كل الناس يلّي في، بكون مستقل، وعم عيش الإستقلال.
لمن بتربّى بصير أعرِف إنو الدين والطايفي هنّي لإلي، وطني وطن الكل... بس وطني هوّي أعزّ شي عا قلبي، وما بفضّل ولا وطن عليه، لا قريب ولا بعيد، وبس لوطني بضحّي، وكرمالو بموت، بكون مستقل وعم عيش الإستقلال.
لمن بتربّى وبصير أعرِف أنو عِيشْ عا مساحة كل وطني، يعني كل وطني هوّي وطني، وإنو كل الناس عا أرض وطني هنّي أهل وطني، فرَحُن فرحي وحزنُن حزني، بكون مستقل وعم عيش الإستقلال.
لمّا بصير طِيع قوانين وطني، واحترم بوليس وطني، وإشارات وطني... بكون مستقل وعم عيش الإستقلال
لمن بتربّى وبصير، بدَل ما إلعن عتمة وطني وظلمة وطني، ضوّي في شمعه تنوّر على المحتاجين والفقر والمظلومين والمقهورين يلّي بوطني، بكون مستقل، وعم عيش الإستقلال...
لمّا بعرف أنو في جيش واحد بيحمي وطني، وبيحافظ عا سيادة وطني وأمن وطني، وحدود وطني، وتاريخ وجغرافية وطني، بكون مستقل وعم عيش الإستقلال.
يا تلاميذ سيّدة الجمهور، يا جيل المستقبل والأمل
لأنو نحنا من الوطن، والوطن منا ، فينا نعملوا متل ما بَدْنا
القرار إلنا، الإستقلال فينا بقلبنا حلم، تعُو نبلّش نعيشو حتى نصير نحنا الإستقلال، تنضل سَوا، إيد بإيد، رافعين إستقلال وطن الكرامي والعنفوان والأخلاق والعلم... لبنان
عشتم
عاش الإستقلال
عاشت مدرسة سيّدة الجمهور
عاش لبنان
أنطوني فغالي SV3
