Indépendance 2023 : Mot du comité des profs

Le Comité des professeurs, représenté par sa secrétaire générale Mme Cynthia Hayek.

حضرة الأب الرئيس، حضرة الآباء الأجلّاء، زملائي الأحبّاء، يا طلّاب مدرسة سيّدة الجمهور،

80 سنة قطعوا على استقلال لبنان، من 22 تشرين الثاني 1943 لـــ 22 تشرين الثاني 2023.
80 سنة ونحنا منحتفل بذكرى الإستقلال رغم كلّ الظروف، بالأخصّ آخر كم سنة، وبتعرفوا شو قطع علينا من أزمات صحّيّة، إقتصاديّة، إجتماعيّة وأمنيّة. إنتو الطلّاب ونحنا القطاع التربوي تحدّينا كلّ الصعوبات وقاومنا وتحلّينا بالإيمان واستمرّينا، وبالرغم من كلّ المشاكل، كانت مدرستكم، مدرسة سيّدة الجمهور، محطّ أنظار الكلّ بشموخها الدايم على هالتلة، بصمودها، بتحدّيها لكلّ الظروف وإصرارها على العمل الدائم.
وطبعًا هيدا الشي مش ممكن يتحقّق لَو ما الأشخاص الموجودين بهالمؤسّسة آمنوا ووثقوا فيها. وبفضل تضحيات الهيئة التعليميّة بالمدرسة وكلّ شخص بيشتغل بهالمدرسة، إنتو كطلّاب استمرّيتوا بتحصيل العِلم وضلّيتوا تحلموا ببكرا. 
ببكرا أحلى وأفضل.
واليوم أمل الإستقلال الحقيقي فيكم، إنتو طلّاب هالمدرسة، يللي عم تتحصّنوا بالعِلم والمعرفة والأخلاق كلّ يوم.
بوطن مثل لبنان، ما فينا نقاوم إلاّ بقوّة العِلم والتفوّق.
الطالب اللبناني بيلمع وين ما راح، بكلّ بلدان العالم، وبيرفع إسم بلدو بالعالي.
إنتو كطلّاب، واجبكم ترسيخ الإستقلال.
واجبكم بناء وطن بيشبهكم وبيشبه طموحاتكم،
واجبكم ما تخلّوا حدا يأذي بلدكم،
واجبكم ما تستسلموا للكسل واليأس.
أدّ ما الدرب طويل وصعب، لازم تعرفوا إنّو بالآخر رح توصلوا. بالإصرار والإجتهاد بتتحقّق كلّ الأهداف.
بِحُبّ الوطن والإنتماء لإلو بيتحقّق كلّ يوم الإستقلال.
عشتم، عاش لبنان،
عاشت مدرسة سيّدة الجمهور.